KARNI MATA CHIRJA

सगती आरत सांभळे , तारत आवड़ त्यांय ।।

देवी भारत देश री , सारत काज सदाय ।।1।।

इम परवाड़ा आपरा , म्हें सुणिया घण मात ।।

अवस रखावण आवसी  , बणी तिहारी बात ।।2।।

उर बीच शंको आवड़ा, इम सालत हैं आज  ।।

दीसै नह हथ दोकड़ो , किम सरसी मां काज ।।3।।

मीठा परचा मात हैं , आवड़ दिया अनेक ।।

रदे भरोसो राखके , नांह नीति तज नेक ।।4।।

अद्रश्य रूपे आवसी , सगती करण सहाय ।।सिध कारज होसी सबे , महर कियां महमाय ।।5।।

 विपदा हर विसवेसरी , कर किरपा किनयांण ।।

धर दैसांणे तूं धणी , सर धर हाथ सुजांण ।।6।।

 साद दास रो सांभळे , मात धरो नह मौन ।।

आप न तारण आवसी , (तो) करे भीर फिर कौन ।।7।।

देवी पकड़ो दास की , बूडत वखते बांह ।।

जद जाचक तव जांणसी , नांव डूबेगी नांह ।।8।।

छेलो अब तो सांभळो , हेलो करूं हुजुर ।।

माया मेलो मावड़ी , भर थैलो भरपूर ।।9।।

दश दोहां में दाखवी , मन री पीड़ा मीर ।।

काज सुधारण कारणें , भयहू करणी भीर ।।10।।

मीठा मीर डभाल